Sutjeska je pred svojim navijačima savladala Jezero 1:0 i biće usamljena na vrhu tabele sigurno do srijede, kada je planirano da se odigra odgođeni susret Dečića i Budućnost.
Trenutak odluke kraj Bistrice viđen je u prvom minutu drugog poluvremena – Bojan Damjanović je strijelac. Dobro se snašao u kaznenom prostoru Plavljana nakon centaršuta Marka Šimuna i pokušaja glavom Radoša Dedića. Mladi, 19-godišnji fudbaler Sutjeske pokupio je takozvani otpadak i sproveo ga u mrežu.
Trudilo se Jezero da odgovori, nekoliko puta ozbiljno priprijetilo preko najefikasnijeg igrača lige, Đorđa Maksimovića, ali je uvijek na visini zadatka bio Vladan Giljen – brani u jako dobroj formi.
