Nikšićke anegdote: Sanovnik

U ranu zoru dođem kući sa karata, sa jedne od rijetkih partija u kojoj sam bio dobitnik. Taman da podmirim neki dug. Uđem u sobu. Naročito obratim pažnju je li žena zaspala. Čuh kako hrče. U redu je, pomislih. Pare ostavih u šifonjer i pogledujem ka krevetu. Legnem. U neko doba probudi me škripa vrata od šifonjera. Malo provirih na jedno oko. Vidim kako žena uzima one pare i premješta ih na drugo mjesto. Kad se probudih, ustanem polako i premjestim pare pod tepih, uđem u kuhinju i počeh majki san pričati:

– Kao ja dobio neke pare i sakrio ih u drva. Žena ode da cijepa i pronađe skriveni novac.

– Svađa! Pare u snu su svađa, protumači majka.

Žena kao oparena uđe u sobu. Brzo izađe.

Majka konstatova:

– Rekoh ja.

Iz knjige „Nikšićke priče“, autora Milutina Mića Mrgudovića.