Iz Sportsko ribolovnog kluba (SRK) „Nikšić“ tvrde da je na zatvaračnicama na Slanom jezeru i u Norinu, zbog remonta kanala Zete koji obavlja Elektroprivreda, uništeno oko deset tona ribe, a spašeno svega nekoliko, prenose Vijesti.
„Iz Elektroprivrede su nas, kao i prošle godine obavijestili o planiranom remontu, ali je zbog podizanja klapni veliku količinu riblje mlađi i konzumne ribe voda odnjela kroz propuste, a turbine je samljele. Pokušali smo spasiti što više ribe. Za razliku od minule godine kada je spaseno oko 6. 600 kilograma, ove godine jedva smo izbavili oko četiri tone, od čega oko tonu na Slanskoj brani i ostatak u Norinu”, kazao je Vujica Lalić, koordinaror aktivnosti SRK ”Nikšić”.
Prema njegovim riječima u bazenu na Slanskoj brani ostalo je oko tonu i po ribe. Mrežama su pokušali spasiti što više ali situaciju su dodatno otežali loši vremenski uslovi.
“Specijalnim vozilom ribnjaka vlasništvo Božidara Krsmanovića ribu koju smo spasili u Norinu prevezli smo u Liveroviće. Elektroprivreda, iako je u obavezi, još uvijek nije uradila baraž. Jedinu nadoknadu imamo za poribljavanje, što je neznatno, ako je šteta prilikom remonta desetostruka veća”, kazao je Lalić.
Z.G.
