Ljeto je vrijeme sunca, zabave i odmora. Kako je došlo ljeto među ljudima se javlja pitanje kako će provesti svoje godišnje odmore. Godišnji odmori prilika su za obnovu radne energije i “punjenje baterija”, ali i kako bi se smanjio nivo stresa, kojim se napunimo tokom ostatka godine. Životni tempo u kojem nema vremena za odmor može vidno da ošteti zdravlje, pa nam je svima potrebno barem nekoliko dana relaksacije.
Danas smo pitali naše sugrađane kako oni provode vrijeme i da li su već bili ili će ići negdje na odmor.
Odgovori naših sugrađana bili su dosta slični. Većina njih dane provodi uglavnom radno i kažu da će ići na neko putovanje, ali ima i onih koji kažu da zbog naglog porasta cijena nijesu u mogućnosti otići na odmor.

Naša sugrađanka Danijela kaže da ove dane provodi radno, ali da će početkom avgusta otići nedjelju dana na more.

“Obaveze, svaki dan isti, nažalost, ali se nadam da ću makar 2, 3 dana imati slobodna da iskoristim za more”, kazala nam je Slađa.

Jasmina kaže da je trenutno bez posla i da ove dane provodi uglavnom za traženje novog posla. Dodaje da još nije bila na ljetovnje, i da nije planirala u skorije vrijeme odlazak van Nikšića.

Darko kaže da ovo ljeto ima posla više nego inače, tako da mu dani prolaze radno, ali svakako će otići negdje na odmor, a to će vjerovatno biti Zlatibor.

“Trenutna situacija je takva da većina njih neće biti u mogućnosti kao ranijih godina otići negdje na 10ak dana, ali eto, nadam se da ću makar na obdan otići na more. A ovih dana imam posla i u kući i oko kuće, pa mi dani prolaze pospremajući” kroz smijeh odgovara Natalija.

Ni naš sugrađanin Zoran još planirao odmor i dodaje: “Trenutno nijesam u mogućnosti da idem negdje, a valjalo bi i prijalo bi mi, ali vidjećemo, tek je počelo ljeto.”

“Selimo se, pa mi dani prolaze u svim tim obavezama”, kratko nam je odgovorila Maja.

Ljeto je vrijeme i kad se radi više nego inače, smatra naš sugrađanin Nikola: “Ljeti imam najviše posla, jer posao koji radim ne mogu obavljati kad su lošiji vremenski uslovi, tako da ove dane i čitavo ljeto provešću samo na poslu”.

Naš petnaestogodišnji sugrađanin Ilija kaže da ima previše slobodog vremena, da vrijeme provodi uglavnom kod kuće, a predveče kad zahladi igra košarku sa svojim drugovima.

“Domaćica sam, velika smo porodica pa kućnih poslova ima dosta svaki dan, tako da mi svaki dan bude uglavnom isti. Planirala sam samo na selo da odem 10ak dana, ali ni tamo neće biti odmora”, odgovorila nam je Mira.