U posjeti buvljaku u Kličevu
Posjetili smo buvljak u Kličevu, sa namjerom da vidimo i čujemo kakva je tamo situacija. Željeli smo čuti mišljenja prodavaca i kupaca o ponudi, potražnji kao i eventualnoj zaradi.
Zatekli smo situaciju gdje su štandovi puni, od veša, papuča, plastike, odjevnih predmeta, jorgana pa do baštenskog alata. I pored svega toga posjećenost je bila jako loša. Tek po neki šetači, kako ih nazivaju prodavci.
”Uzalud nam je pun štand, kad nema žive duše”, rekao nam je Drago. Prodavci kažu da je problem što više njih plasira sličnu robu, pa zato ko ”naleti” gledaju pored čijeg će se štanda zaustaviti. Rekli su nam da prodavaca Roma i Egipćana skoro da i nema, jer im je skup zakup prodajnog mjesta, pa idu na buvljak na Željezaru. A kako se čini i kupci za njima. I pored sveg šarenila, situacija na buvljaku u Kličevu je siva.
